關羽歷史上到底有冇「過五關斬六將」？

喺形容大家渡過重重難關之後，我哋都會用上「過五關斬六將」一詞，而呢個詞就係起源於《三國演義》關雲長一度被曹操所擒，喺立功報答之後就拜辭曹操，護送二位嫂子尋找兄長劉備。沿途關雲長就經過東嶺關、洛陽、汜水關、滎陽和滑州五處城關，斬殺孔秀、孟坦、韓福、卞喜、王植和秦琪六員大將，後世就稱呢個故事為「過五關斬六將」。

呢個故事就起源於《三國演義》，真實性自然就大打折扣，但到底歷史上關羽又有冇做過類似嘅事呢？後世學者就先從「過五關」嘅路線研究起，雖然洛陽、汜水關、滎陽呢三關都算連得通，但由許昌過黃河嘅路途本應係唔需要兜一個大圈，換言了喺地理條件上關羽係唔需要「過五關」就已經可以去尋找劉備。

至於「斬六將」方面，其實喺關羽離開曹操後，曹操亦都阻止佢嘅部下發兵追趕關羽，即使會有部分地方守兵攔截關羽，但都唔足以構成「斬六將」嘅場面。而且當時劉備已經被袁紹派遣到汝南一帶，極有可能喺行程一半就已經唔需要到黃河邊，所以「過五關斬六將」嘅真實元素並唔多。